سمعت قبل كدة من ماما ان الجواز ف المنام يعني موت
و النهاردة حلمت اني اتجوزت
اتجوزت واحد و الواحد ده اعرفه كويس اوي و فرحه كمان ايام
خفت عليه و عليا اوي
صحيت مش زي كل يوم لما بصحى
صحيت مش بفكر ف احلامي و اعمل ايه و اقوم اقرا ايه ولا اعمل ايه عشان اوصل للي بتمناه
صحيت سمعت الادان مع انه مش ساعة الادان
و لبست الازدال و قمت اصلي
قلت مانا عارفة برده ان الواحد بيحس انه حيموت قبل مايموت بكام يوم
مانا لو حموت لازم اتبسط بكل يوم قبل ماموت
لازم ابسط اللي حواليا
لازم ارضي ربنا
مش هعد افكر و اخاف لسه و اعيط
فكرت تفكير اول مرة افكر فيه
اني ممكن اموت ف اي وقت
بقيت بعمل اي حاجة و خايفة تبقى حرام
و بسأل نفسي سؤال هي حرام ولا لاء قبل ماعملها اصل خلاص مبقاش في وقت اصلا اغلط و اصلح غلطي
صحيت حابة الدنيا اوي فجأة
و مش عايزة اسيبها و كل مافكر اني عايزة اعمل حاجة و اقول خليها لبكرة
اقوم اعملها
اصل ممكن ميكونش في بكرة
انا معرفش اللي حلمت بيه ده هيحصل ولا لاء
و كمان قريت ان زواج العازبة ف الحلم معناه خير مش موت
بس كل الي عايزة اوصله
ان كل للي بيحصل
ان الحاجة لما تبقى معاك فعلا عمرك مابتحس بقيمتها
بس اول ماتحس انك هتفقدها
احساسك بيبقى حيتجنن عليها بيمسك فيها بكل قوته
بيفكر ف كل اللي حواليه تفكير تاني
و لو كان متضايق من حد
بيفكر انه ممكن يسيبه خلاص
و اننه لازم لما يسيبه يفتكره بالخير عالاقل
و انه لازم يتبسط
و لازم ميضيعش لحظة من غير ميقضيها جمب حد بيحبه اوي
عشان فعلا ممكن ميلاقيهوش كمان شوية
و عرفت بس
لما اتقالتلي من واحد مريض ربنا يشفيه عنده مرض ممكن يموته ف اي لحظة
انه اول ماعرف انه مريض بالمرض ده
كل تفكيره اتغير
ابتدى يفكر ازاي يتبسط ابتدى يفكر ازاي حيسيب ولاده
و عايزهم مبسوطين بعده ازاي
ابتدى يحاول يقرب منهم اوي
اعتقد بجد لو حد حس انه فعلا حيموت بكرة و صدق نفسه
هنبقى احسن ناس ف الدنيا و معتقدش ابدا اننا حتى حنسمح لنفسنا نتضايق لان دي دنيا
يعني بتاعة ربنا و حياخدها ف اي وقت
يعني ملهاش لازمة اصلا نفكر ف حاجة تضايق
مش مستاهلة بجد
الكاتبة : ولاء زهران