إشتري شيكولاتة غالية مستوردة و كُلها
العب لعبة ملعبتهاش من و انت صغير .. اعرق .. انهج .. حس إنك عايش
إطفي نور أوضتك و شغل التكييف وإسمع كتير موسيقى بتحبها وإسرح معاها
بُص لأهلك وعرفهم أد إيه إنت بتحبهم
بص للي تحتك واعرف قيمة كل حاجة معاك .. وبص فوقيك واعرف إن رغبتك انك تبقى زيهم هي اللي مدِية طعم للحياة
استمتع بشمس الصيف وبصلها وقولها انك مش كارهها حتى لو عرقتك ولزقتك
روح أُعد على البحر و دخل رجليك ف الرمل و خرجها .. بطل تفكير .. إبدأ حِس
في الشتا إنزل تحت المطر و حُط كُباية الشيكولاتة السخنة جنبك .. و غمض عنيك .. و نام
اشتغل لغاية ماتحس انك ميت .. روح نام .. اشحن .. و روح موت نفسك تاني و اعرف انك زودت حاجة للدنيا محدش كان حيزودها غيرك .. إعرف إنك مهم و في كل لحظة بتغير إتجاه التاريخ
بُص لشحات واقف جمبك متدلوش ولا مليم بس سَلِم عليه و إضحكله و قوله عامل ايه تمام ؟؟
سلم على واحد صاحبك و خده بالحضن .. خدته؟؟ .. طب طول ف الحضن شوية .. بس يبقى صاحب بجد مش ......ن
ابعت رسالة بدون اي سبب لحد و قوله كلمة حلوة
افتح شباك العربية و اطلع عالطريق السريع .. خلي الهوا يطس في وشك .. بس اتأكد إنك مش داخل على لجنة .. و مفيش حد تعرفه في العربيات اللي حواليك
اضربها جزمة .. و خلي اللي يكره يكره و اللي يشتم يشتم و اعرف انهم بايعين الكل .
إتأكد إنك لو عارف أنك هتموت بكرة هتعمل نفس اللي بتعمله دلوقتي
حِب جامد اوي حتى لو حبك مش هيستمر لغاية بليل
كٌل أكل جامد أوي بس متخليهاش تشبعك
اشرب مشروب دخلت المطبخ و اخترعته و لو معجبكش إرميه في الحوض و انزل اشرب حاجة تانية بتحبها
إكسب نفسك و حب حد بيكرهك
وإكسب نفسك تاني وإنسى حد لسة بتحبه من غير ماتكرهه
جرب أكله جديدة ف مطعم فخم تمنها يخرب بيتك : ..
وروح وانت مبسوط
البس احلى طقم عندك و انزل امشي في الشارع و انت فارد ضهرك و متحطش ايدك ف جيبك خليهم كدة مفرودين
إرقص حتى لو ف اوضتك و انت قافل الباب بالمفتاح .. ممكن تغني كمان و انت ماسك الفرشاة على إنها ميكروفون
الكاتبة : ولاء زهران