أحياناً تقوم ببعض الأخطاء الناتجة عن العصبية الزائدة .. تتهور و تدفع الثمن غالياً ...خسارة لأقرب أصدقائك ..تحارب من أجل إسترجاعهم و لكن يوجد أخطاء تواجهها في حياتك تفعلها بمحض إرادتك و لا يجدي نفعاً إعادة إلتئامها ..فليست كل الأخطاء تُنسَى ..و مش عارفة اكمل باللغة العربية الفصحى بصراحة عايزة اقول كل اللي جوايا بصراحة يعني على "بلاطة" و ده مش هيتوفر ف التعقيد و الخنقة اللي ببذلها عشان اجمع الكلمات ف العربي و الزقها تعمل شكل لذيذ .."" خلي البساط أحمدي
في غلطات ف حياتنا بنغلطها عشان نسينا و في غلطات عشان نهرب من واقع بيحاوطنا و في غلطات نتيجة لضعف و مهانة بنحسها اكتر لما بنعمل الغلطات دي رغم اننا بنفتكر اننا بنهرب ليها من ضعفنا لكن هي للاسف بتضعفنا اكتر و المشكلة ان الكلام اللي بنسمعه كتير من ناس يعني انسى غلطاتكك و ابدأ بيبقى كلام صوري لان مفيش حد حيحس باد ايه وجع حد اللي ناتج عن غلطات ارتكبها فقدته ثقته ف نفسه و اثرت عليه ف مستقبله و احلامه و افقدته الأمل انه يبقى انسان من الاخر محترم و ابشع بقى احساس ف الدنيا انك تبقى مش محترم نفسك و منتظر من الاخرين يحترموك و يقدروك طب اذاا كان انت نفسك مع نفسك مش حاسس بامان و مش محترم نفسك
و فاقد الشئ لا يعطيه .. انسى ..بس ساعات بقابل ناس بيحسسوك انك مقبول للغلط لانك انسان و ده طبيعي و مش مهم يلا نبدأ من جديد و ناس تانية يااااااااااااااااااااه لو حست بغلط بسيط حتى من طفل زي انه يوقع كباية مية ف الارض انت ازاي متركزش ازاي و ازاي غلطت ده بينمي احساس ف اي طفل بالخوف انه يغلط و الخوف من المخاطرة و الخوف انه ياخد مخاطرة ف شغله او ف مستقبله او حتى ف دفاعه عن بنت بيحبها ..هو اصلا خايف من اي مخاطرة لانه اتربى على احساس و شعور "الغلط عيب"لو غلطت تبقى مش متربي ..مع ان كل الناجحين دلوقتي اتبنوا اصلا من احساس اني فاشل و ابتدوا يتحدوا نفسسهم اشمعنى غيري ينجح و انا منجحش و من التحدي اتولد الابتكار و العبقرية و طبعا مش محتاجة اقول قصص عشان تثبت ان كلامي صح ..بس سيبك بقى من مين يقولك ايه لما تغلط سيبك بقى من مين يقولك مش مشكلة و سيبك بقى من مين يقولك لا عيب ازاي غلطت
انت ؟
ايوة انت شايف نفسك ازاي
يعني قابل نفسك على غلطك قابل نفسك و بتقول اني انا غلطت و مش مشكلة يلا اعممل ف اللي جاي حاجات صح كتير تخليني اغفر لنفسي غلطي
ولا هتسمح لنفسك تكرهها عشان انت غلطت كتير ف لما هتكرهها هتقسى عليها اوي و تسيبها لاهوائها و غلطاتها مانت اصلا مش حاببها
دايما الانسان لما يبقى كاره نفسه بيبقى زهقان منها ف بيدور يقرفها اكتر ازاي و يقرف الناس معاه و كل مايواجه زعيق او انت ليه بتعمل كدة او ايه الارف يقول خلاص انا اصلا وحش ف طز بقى يلا ابقى وحش بضمير
لكن لما تبقى عارف ان نفسك دي انت اللي بتقولها يلا تعالي معايا نفهم بعض كدة و انتي عايزة ايه و ايه شاغلك و ايه ف بالك ايه مضايقك طب ايه بيخليكي متبقيش صاحبتي و بتضايقيني دايما لما بشوف حد متضايق من تصرف ف حقه وحش انت كدة بتصالحها و بتحبها بتبقى انسان مستقر من جوا ف اكيد ده هييجي على حياتك و دراستك و كل حاجة بعد كدة لانك بتذاكر او بتشتغل عشان انت حابك حابب نفسك عايز تخليها حلوة فدايما همك تخليها حلوة ازاي و تطبطب عليها لما تغلط معلش مش مشكلة مش هتغلطي تاني بس متتضايقيش يلا نقوم نقف على رجلينا و يارب ساعدني انا ونفسي ..لكن القسوة على النفس و انك تحملها فوق طاقتها ده اكتر حاجة اصلا علميا مدمرة لخلايا المخ
عملوا مقارنة بين مخ الطفل و مخ البالغ و السيستم بتاع الكمبيوتر ايه اكتر حاجة فيهم معقدة او بتشتغل بككفاءة اعلى
تخيلوا اكتر حاجة طلعت ايه ؟
مخ الطفل ..طبعا مفاجأة
بس بيقولك اكتر حاجة مبتكرة و مبدعة ف الكون هو مخ الطفل اللي اي مخترع ميقدرش يعمل زيه تاني
لكن الانسان لما بيمر بكل المراحل و بيوصل انه انسان بالغ ده بيخلي من كتر الضغوط اللي بيقابلها و كمان الضغوط الناتجة ان انا باجي على نفسي كتير و بحملها فوق طاقتها و مبسامحاش و تأنيب الضمير الزيادة و كل الضغوطات دي بتعمل زي ماس كهربي ف المخ بيخلي الخلايا و الشرايين تتقطع
بيُعاد إلتئامها لو اتعالج سبب الضغط بسرعة لكن لو حملت نفسك ضغوطات كتير و اكتر بكتير من المفروض
ده بيضعف خلايا المخ جدا و بيخلي قدرة تركيزك على اي شئ ضعيفة و بيخلي برده كفاءتك ف انتاجك لاي حاجة ضعيفة جدا ..
رفقاً بك ..
الكاتبة : ولاء زهران