كل ماروح مكان الاقي حد يقولي انا مثلي الاعلى كذا انا مثلي الاعلى كذا
و انا صغيرة كنت بسأل كتير يعني ايه اصلا مثلي الأعلى
هو يعني هيبقى طويل و بعضلات
ولا هيبقى عالي اوي مش هعرف ابصله
يالهوي
ده انا هبص لرجله بس هطلع اجري
ده هيبقى ضخم اوي
و اعد اعيططططططط
ههههههههههههه
بس عرفت ان المثل الاعلى ده بعد كدة القدوة
يعني الانسان اللي من كتر مانت متأثر بيه نفسك تبقى زيه
جيت افكربقى
مين مثلك الأعلى يا ولاء
؟؟
كل ماكنت بدور على حد قريب مني مثلي الأعلى
بلاقي فيه حاجة مش كاملة
و انا شايفة ان مثلي الأعلى ده يبقى كامل من مجاميعه
طب و بعدين ده انا لماحد يستضيفني ف برنامج
(اه اصل انا ان شاء الله هيستضيفوني )
انا بحلم على طول اني قاعدة قدام واحدة وبتسألني و بتخيل بقى حبقى عاملة ازاي وقتها هههههه
المهم ده لما حد يستضيفني في برنامج مش هعرف ارد
ممممم و افكر تاني
لقيت ان كل حد قريب مني مثلي الأعلى ف حاجة واحدة و مفيش حد مكمل كل الحاجات مع بعض
بابا مثلي الأعلى ؟ بابا مثلي الأعلى ف قوته رغم ان القوة دي ليها عيوب كتير بس عالاقل ف عز ماهو مكسور قوي و رافع راسه قدام كل الناس و طموح لدرجة تشيب
ماما مثلي الأعلى ؟ ماما مثلي الأعلى ف حنانها و رقتها و طيبة قلبها و خفة دمها و حبها لينا اللي كان دايما بيقويني و لما بغلط كانت بس هي اللي بتعذبني مش بزعيق ولا حتى بكلام لا كفاية بس بتأنيب ضميري اني غلطت ف حقها مثلي الأعلى ف تربيتها ليا لان مهما كنت بغلط كنت برجع ندمانة و مكسورة قدام ربنا عشان كنت دايما برجعله مهما غلطت ف حقه و ف اني فخورة بيها
طب مين؟
اختي الكبيرة مثلي الأعلى؟ مثلي الأعلى ف طيبة قلبها و عقلها و الجمال اللي هي عمرها ماشفته ف نفسها اد ماكلنا شفناه و اللي انا
بحسدها عليه عشان هي اجمل واحدة فينا احنا التلاتة
و لما كنت باخد حد قدوة تاني
للاسف بيثبتلي ف الاخر انه مش قدوة ولا حاجة
فعرفت ان مفيش قدوة كاملة ابدا و لا مثل اعلى
مش عارفة حرام اقول كدة ولا لاء
بس لو ربنا فيه منه انسان يبقى هو ده مثلي الأعلى
مبيظلمش بيسامح و عمره مابيشيل بيقوينا و بيطبطب علينا بيساعدنا دايما نبقى احسن مهما كان جوانا هموم و اول مانسجدله و نعيط على سجادة الصلاة كل همومنا بتتحول قوة
ربنا اللي مستنينا ف اي وقت و عمره مابيزهق من اي حد تعبان
ولا عمره قال كفاية تعب و كفاية شكوى
ولا عمره مثلا بعد عشان زهق مننا
ولا عمره قال كلمة و رجع فيها معانا
ولا عمره كره حد و لا عمره اتكلم على حد
ولا عمره بخل على حد
ولا عمره .............. يااااااااااااااااااااااااااه
فعلا ان تعدوا نعم الله عليكم فلن تحصوها
كفااااااااااااااااااااااااااااية ان ليا ايد بتكتب كل الكلام ده و عين شايفاه
دي كفاية و بالدنيا
انا قدوتي الله عز وجل و مثلي الأعلى
الكاتبة : ولاء زهران