وذكر الموقع أن النشطاء قاموا بنشر صورة الشاب المصري مرفقة بقصته التي حصلت عليها إحدى الراكبات المصريات، بعد أن دخلت معه في حوار مفتوح، بعد أن شاء القدر أن تستقل الأوتوبيس بعد فشلها في العثور على مواصلة «تاكسي» حسب روايتها.
الشاب وفقا للصورة والتفاصيل التي نشرها حساب على «فيس بوك» يحمل اسم «زهراء الألفي»، التي التقطت له الصورة، قالت: «يبدو هذا الشاب في أوائل العشرينيات مرتديا أفخم الثياب وتظهر في وجهه علامات الثقة بالنفس وشدة حبه لعمله وفخره بمهنته».
وتقول «زهراء» عبر حسابها بـ «فيس بوك»: «الشاب ده في أوائل العشرينات من عمره، شاء القدر إني أشوفه النهاردة بالصدفة البحتة بعد ما ركبت أوتوبيس الهيئة العامة عشان أروح، ويشاء ربنا إني أقعد في الكنبة الأولى وأكون قريبة جداً من مقعد السواق، وطبعاً فوجئت باللي أنتم شايفينه، شاب صغير جداً، بصراحة شكيت فيه في الأول، وبعدين لفت نظري هيئته ولبسه (لابس ساعة وجزمة شيك جداً)، وقميص وبلوفر، وكمان أدبه في الكلام مع الركاب، وظهره المفرود وثقته في نفسه».
وتضيف «زهراء»: «غصب عني لقيتني بتابعه، بصراحة تاني، صقر قاعد قدام الدريكسيون، تركيز عالي وسواقة باحتراف لدرجة إن عينه على رجلين الركاب صعوداً ونزولاً علشان مايوقعش حد، طول الطريق، رغم الزحمة والرخامة وأسئلة الركاب المتكررة، مافيش حاجة نرفزته ولا تلفظ بأي كلمة مش ولابد، ماقدرتش أحوش نفسي من إني أتكلم معاه، الشاب ده معاه بكالوريوس معهد عالي بعد الثانوية، بقاله أربع سنين شغال سواق على أتوبيس، ومبسوط بشغله في الهيئة وفرحان بالمرتب اللي بياخده اللي اعترفلي بصراحة أنه مرتب كويس، راضي أنه شغال في الحكومة، الشاب ده نموذج للاجتهاد ومثال لقيمة العمل، لما قلتله أنا فخورة بيك وبكل اللي زيك، كان في منتهى السعادة، لما قلتله إنت سواق محترف، كان في منتهى الاعتزاز بنفسه لما قلتله ممكن أصورك وأنزلها على فيس بوك، كانت الدنيا مش سايعاه لما قلتله ربنا يباركلك ويفتح عليك، كانت ابتسامته تتوزع على الناس كلها».
